अपने पति नै लेके वा चाली, आंख्या मैं पानी आया हो राम
सास ससुर ओर जेठ देवर नै, सबनै हाथ हिलाया हो राम
1. छोटे छोटे बालक रोवे, पाट कालजा आया हो राम
बालक रोते छोड दिए उने, हर मैं ध्यान लगाया हो राम
दो साल का बालक रोवे, झट छाती के लाया हो राम
आग पेट की खोटी होसे, फेर भी मन समझाया हो राम
2. रोती रोती चाल पड़ी उका, कोए ना साथी पाया हो राम
छाती के म्हां मुक्का मारया, सब ईश्वर की माया हो राम
देरानी जेठानी कोण किसेकी, कोन्या साथ निभाया हो राम्र
कांधे बिठाके अड्डे पै आई, ढलती फिरती छाया हो राम
3. रोती सुबकती मोटर मैं चढली, दोया नै हाथ लुवाया हो राम
याणे याणे बालक छोडे, कष्ट भतेरा ठाया हो राम
कित ले ज्याके मारेगी इसनै, कुणबे नै पलमा लाया हो राम
डाण डंकणी, मानस खानी उसने नाम धराया हो राम
4. रोती रोती घाटे में पंहुची, कांधे पै बलमा ठाया हो राम
बाबा की उसनै पेशी लाई, करो निरोगी काया हो राम
बालाजी के वा गई रै भवन मैं, चरणा शीश झुकाया हो राम
दुखी ए घणा अशोक रहे सै क्यूं ना ज्ञान सिखाया हो राम