कोए पूछे जब पहचान तेरी, तूं बोल हरियाणा
हरियाणा के लोगां ने गाढ़े होके धरती मै लठ, तन्नैं आसमान मैं गाढ़ के सै दिखाणा
कोए पूछे जब पहचान तेरी, तूं बोल हरियाणा
आड़े कालेज के बाहर दूध अर पेड़ां की दुकान की दुकान होया करे,
जिम ते ज्यादा बॉडी अखाड़े मैं तैयार होया करे
आड़े बालक दूध का गिलास एक सांस में खत्म करया करै
बजरंग पहलवान सैकंड तै पहला पहलवान नैं चित कर दिया करै
जिब ओलंपिक मैं मैडल की लिस्ट देखोगे, तो अपने बालकां का नाम सबतै उपर सै पाणा
कोए पूछे जब पहचान तेरी, तूं बोल हरियाणा
आड़े आदमी पिस्यां तै ज्यादा इज्जत पै मरया करैं
सोचे बस गामां आले सैं, बता दो उनते आईएएस तै लेकर साइंटिस्ट की लिस्ट मैं म्हारे नाम पाया करै
दस आदमियां का मुक्का अर म्हारा एक रुका बराबर होया करै
बात खेती की हो चाहे फौज मैं दम दिखाण की, हम काण ए बदल दिया करैं
जड़े बड़ा हमेशा सिराहणे, छोटा हमेशा पायतां कानी सै पाणा
कोए पूछे जब पहचान तेरी, तूं बोल हरियाणा
थम तिरंगे ने फहरा सको, यो हक दिलवाण आला हरियाणवीं सै
जिन नैं बालीवुड में धूम मचा राखी रणदीप हुड्डा, जयदीप अहलावत राजकुमार राव हरियाणवीं सै
आड़े की छोरी धरती पै आंखां आगे तै मैडल अर आसमान मैं जहाज फहराया करै
जब बात खूबसूरती की आवे मानूषी छिल्लर मिस वर्ल्ड का खिताब खुद लियाया करै
जो किताबां की घणी बात झाड़े, गीता का ज्ञान म्हारी धरती पै दिया गया सै यो बताणा
कोए पूछे जब पहचान तेरी, तूं बोल हरियाणा
जो अपने शहरां की फोटो भेजे, कदे म्हारे गुरुग्राम आवो
पिज्जा बर्गर खाण आलो, म्हारा देसी खाणा खाके दिखाओ
दादा लख्मी चंद नै जो लिख दिया इब तक वो सर्च करण लाग रै सैं
मुंह थोड़ा परै नै करले, मुछां कै मरोड़ी देके हरियाणवीं आण लाग रै सैं
हम दोस्ती नैं दिल तै निभाया करें, काम शुरु करलैं तो जान देके भी पूरा करके दिखाया करै
या बात ब्होत ज्यादा है, पर मेरे बस की ना है सारी कह पाणा
कोए पूछे जब पहचान तेरी, तूं बोल हरियाणा