जीते जी तै सडय़ा खाट मैं, मरया नव्हाए के होगा

जीते जी तै सडय़ा खाट मैं, मरया नव्हाए के होगा
टेम पै रोटी देई ना खाण नै, इब गाम जीमाएं के होगा

1. सुबह शाम तन्नै एक घड़ी भी पैर भी दबाए ना
कड़वा बोल सदा तूं बोल्या, सुख के टूक खुवाए ना
धर फोटू आगे भाईयो, फूल चढाए के होगा

2. टूटे लीतर मैले कपड़े कदे धोणे का काम नहीं
टूटी खाट पै पाट्या गुदड़ा, जिसपै सोणे का काम नहीं
बणा समाधि खेतां के म्हां, चीर उढाए के होगा

3. मात पिता का बदला भाईयो, किसे जन्म ना तार्या जा
करता दगा जो इनके संग मैं, बिन आई नैं मार्या जा
करके याद पिछली बात नैं, नीर बहाए के होगा